Elke leerling, onderwyser, ouer of enige persoon wat se pad met Lochnerhof kruis, los sy eie unieke voetspoor op die groei en ontwikkeling van Laerskool Lochnerhof.

Voetspore … die sigbare merke wat elke dag verklap waar ons was.

Volgens ‘n veldgids is daar ‘n klomp dinge wat spore verklap as jy as veldgids of spoorsnyer voetspore volg in die natuur;

• Die tipe dier en miskien sy karakter.
• Die rigting waarheen die dier op pad is of waar dit vandaan kom.
• Die geslag en selfs die ouderdom van die dier.
• Die spoed waarteen hy beweeg – hardloop hy of loop hy.
• Of die dier gewei het. As die spore naby aan mekaar is, wys dit dat hy rustig is.
• Of die dier in sy eie habitat is.
• Spore los ook ‘n reuk agter – die dier se merk.

Laerskool Lochnerhof besef elke dag dat hulle met unieke leerders werk wat elkeen sy/haar  eie voetspore het en op sy/haar manier bydra tot die unieke samestelling van die uitleef van Laerskool Lochnerhof se Rotsvas Leefstyl.

Ons stap saam en bewaar ons unieke en wonderlike leerders deur hulle voetspore te monitor sodat hulle veilig hulle unieke voetspore kan loop in Laerskool Lochnerhof.

Voor ons het baie Lochies diep spore getrap in die samelewing en elkeen hulle unieke voetspoor gelos om Lochnerhof se leefstyl uit te dra.

Wat is die voetspore wat jy gaan los vir 2023 en daarna?

Veldgroete

Marius Botha
SKOOLHOOF